Alita Cómics acollerá mañá, venres 21 de decembro, na tenda do Orzán, 94 a partir das 19:30 horas un recital da poeta galega Yolanda Castaño que combinará poesía e ilustración co gallo do novo libro: “O puño e a letra”, e que estará acompañada por varias das ilustradoras coas que traballou nel, como son María Álvarez “Yupiyeyo”, Paula Esteban e Xulia Pisón, entre outros autores máis.

Este é o primeiro libro da tradición editorial galega que afronta a descuberta do xénero internacionalmente coñecido como Comic Poetry: o diálogo da poesía e a banda deseñada que en galego poderiamos traducir por “Cómic Poético”. 40 poemas interpretados en viñetas por 40 dos nomes máis salientables da escena galega. 40 textos seleccionados de entre os 25 anos de aventura literaria de Yolanda Castaño aos que dan nova vida gráfica os seguintes ilustradores: Norberto Fernández, Alberto Taracido, Cristian F. Caruncho, Jano, Fran Jaraba, Xulia Pisón, Paula Esteban, Fran Bueno, Xulia Vicente, David Rubín, Miguel Robledo, Manel Cráneo, María Ferreiro, Alicia Jaraba Abellán, Víctor Rivas, Kike J. Díaz, Xosé Tomás, Anxo Cuba, Los Bravú (Dea Gómez & Diego Omil), Yupiyeyo / María Álvarez Hortas, David Pintor, Kiko da Silva, Miguelanxo Prado, Roberta Vázquez, Xan López Domínguez, Siro, Xaquín Marín, Rubén Mariño, Pepe Carreiro, Santy Gutiérrez, Martín Romero, Ramón Trigo, Brais Rodríguez, Miguel Cuba, Cynthia Alonso, Abraldes, Miguel Porto, Dani Xove, Tokio, Fernando Iglesias «Kohell».

Trátase ademáis dunha das propostas que incluímos na guía de Nadal das Bibliotecas Municipais Historias de regalo. Libro e evento para non perder!