Dende hai uns anos a base do traballo co instituto de referencia da Biblioteca Fórum, o IES Fernando Wirtz, é o da promoción lectora co alumnado dos primeiros cursos (1º e 2º) e a Alfabetización Informacional e Mediática co alumnado de 3º curso. Movémonos tendo como base a crenza de que a biblioteca pública é unha institución educativa por iso a nosa biblioteca sempre foi -e así debe seguir- un centro de apoio ao proceso de ensino-aprendizaxe no que as funcións formativas e informativas mestúranse con frecuencia.
Algúns exemplos de sesións de ALFIN e promoción lectora na Biblioteca Forum e no IES Fernando Wirtz
Partindo desa base pretendemos, entre outros obxectivos, contribuír á formación dunha actitude positiva por parte do alumnado, fronte á lectura e aos libros; estimular o desenvolvemento de habilidades de comunicación e comprensión; promover e contribuír á formación de lectores selectivos e creativos e contribuír á formación de actitudes críticas fronte aos diversos materiais de lectura e aspectos xerais da vida.
Este ano sumámonos á campaña que a Rede de Bibliotecas Municipais da Coruña vai poñer en marcha polo Día da Muller “8M Visibilizar o invisible: perspectiva feminista nas BMC”. Nesta ocasión o vínculo presencial coa comunidade educativa vese afectado debido á delicada situación pola que estamos a atravesar como consecuencia da COVID, así é que nos vemos obrigados a transformar a proposta presencial na biblioteca ao entorno virtual na súa maioría, combinado con 4 sesións presenciais nas aulas do alumnado de 3º curso do Wirtz.
A través da visibilización de materias bibliográficos (música, cine e libros) trasladaremos o contexto xustificativo da existencia do Día da Muller e faremos conscientes da súa importancia ao alumnado dos primeiros cursos. Co terceiro curso meterémonos de cheo na aprendizaxe da lectura de cómics e a súa vinculación con temáticas ALFIN. As reseñas tanto neste blog coma en Corto y Cambio e por suposto no blog do propio instituto Fernando Wirtz van ser unha constante durante a temporalización do traballo.
Dende xa recomendámosche que nos sigas a pista porque iremos subindo material ben interesante e esta será unha das nosas canles de comunicación máis visual e directa. Animámoste a que compartas con nós calquera suxerencia, reflexión, aportación en comentarios.
Para quen queira ir comezando coa lectura estes son os catro cómics elixidos que nos permitirán analizar e apoiar a comprensión de contidos sobre a muller.
Polina de Bastien Vivès e publicada por Diábolo Edicións, é a biografía da bailarina Polina Oulinov, que desde nena estuda nunha exclusiva escola de ballet clásico. Nikita Bojinski, o seu esixente e rigoroso profesor, temido por todas as alumnas, escóllea polo seu gran talento e guíaa no camiño cara ao seu máximo potencial artístico. A moza Polina medra na constante procura da perfección e a excelencia, o que a leva necesariamente a tomar distancia para atopar as súas propias motivacións e a súa verdadeira forma de bailar, atopando finalmente o seu lugar, tanto no mundo da danza como fóra del.
Leñadoras escrito por Noelle Stevenson & Grace Ellis . Cinco campistas, scouts de grupo feminino, descobren que non van ter un verán normal. Unha noite, Ripley, Mal, Molly, Jo e April ven fóra da súa cabana a unha anciá que se converte nun oso xigante. Perséguena ata o interior do bosque, onde se atopan cuns raposos moi estraños: son agresivos, son moi grandes para ser raposos e teñen tres ollos. Entre as cinco derrótanos e volven á súa cabana, pensando que ninguén ía notar a súa ausencia, pero… Jen, a súa monitora, claro que se decatou do seu travesura. O grupo das cinco campistas non buscan as aventuras, pero tampouco se resisten a elas cando aparecen. Pronto, unha darase conta de que todos os misterios están conectados e, por suposto, terán que chegar ao fondo do asunto.
Lejos de Boneville con guión e debujo de Jeff Smith. Tres primos expulsados de Boneville pérdense nun enorme e descoñecido deserto. Cada un polo seu lado consegue chegar a un profundo val boscoso poboado por marabillosas e aterradoras criaturas.
Valerosas. 1, Mujeres que solo hacen lo que ellas quieren de Pénélope Bagieu. Premio Eisner 2019 á mellor edición norteamericana de material internacional.Valerosas é o retrato de quince mulleres que reinventaron o seu destino a pesar das circunstancias adversas da vida. Desde científicas, actrices ou activistas, estas mulleres son valerosas, atrevidas, decididas e loitaron por conseguir os seus soños e saír adiante nos seus respectivos periodos históricos.
E para ir meténdonos de cheo en materia compartimos unha frase que a nós nos parece do máis inspiradora.
Existen pocas armas en el mundo tan poderosas como una niña con un libro en la mano.
Malala Yousafzai
fancomic 
Ahora comentas tú: